الصفحة الرئيسية › ثقافة

ثقافة قالو " بلوزْ " BLUES بقلم المسرحي نورالدين الورغي

قالو " بلوزْ " BLUES

...................................

نغنّــي المجرّدْ
لا نسخّن لا نبرّدْ
نغـنّــي المجرّدْ
مانيش نغــرّدْ 
عا نهار اليوم ..

مانيش نلومْ
على الطّــير يحومْ ..

مانيش ندادي 
على الطير الشّادي ..

مانيش نهنّي
مانيش نغنّي ..

صوتي مبحاح
ضاع مات وراح ..

مع طلوع صباحْ
ليلنا مع الفجر طاحْ
طيـر البومْ ناحْ
العُرف ماحْ ..

الرّيـق شاحْ
نلوّج على مراحْ
نقعد نرتاحْ ..

الرصاص يخيّط
كسوة الحشمة
فمّي كالطاقة
يدوّر عالنسمة ..

يا قمح الولْـجة
جوك الحصّادة
ماكش باش تنجا
تلهب كالعادة ..

طــبّال الأعراس
قطّع الطّبلة
بارود وطريزة
والموت من قِـبلة ..

دِجلة في هانة
ملاق ملجّمْ
شِـبعا جيعانة
والنيل متحزّمْ ..

يا رمل الواد
الدفلة بلاحت
لا وشق لا داد
الحمامة ناحت ..

يا حجر العَقْـبة
خايف لا تهبى
دُق الغياز
يا ولد الـ...حبة ..

هذي غناية
هام قالو "بلوزْ "
حكاية وحجاية
عالمترايوز ..

" البلوز " نغني
راوْ لقشة منّي ..

غنّاه بن عَمّي
مسلسل في فلوكة
يا لحمي ودمّي
نحّي لي الشوكة ..

شوكة في جنبي
مانيش نخبّي ..

" البلوز " نغني
راوْ لقشة مني ..

غنّاه بن عمّي 
يبكي ويعدّدْ ..

نذكر ونسمّي
الواد المذبوح
كان ننسى غمّي
تطلع الرّوح ;;

من مسرحية " مغناة المسرحيين " 2006 لنور الدين الورغي